కేరళలో కరోనా మహమ్మారి మళ్లీ తీవ్ర రూపం  

కరోనాను పూర్తిగా కట్టడి చేశామని, కరోనా కట్టడిలో తాము దేశానికే నమూనాగా ఉన్నామని కేరళ రాష్ట్ర ప్రభుత్వం ఒక వంక ప్రచారం చేసుకొంటుండగా తిరిగి ఆ రాష్ట్రంలో కరోనా మహమ్మారి తీవ్రరూపం దాలుస్తుంది. 

కేరళలో ఏప్రిల్‌ నుంచి మే మొదటి వారం వరకూ కరోనా తగ్గుముఖం పట్టింది. ఈ వ్యవధిలో ఒక్కో రోజు రెండు నుంచి మూడు కేసులు మాత్రమే నమోదయిన సందర్భాలున్నాయి. ఇప్పుడు మాత్రం పరిస్థితి అందుకు పూర్తి భిన్నంగా ఉంది. మంగళవారం ఒక్కరోజే కేరళలో 67 కరోనా పాజిటివ్ కేసులు నమోదయ్యాయి.

ఈ 67లో విదేశాల నుంచి కేరళకు వచ్చిన 27 మందికి, మహారాష్ట్ర-15, తమిళనాడు-9, గుజరాత్-5, పుదుచ్చేరి-1, ఢిల్లీ-1, కర్ణాటక నుంచి వచ్చిన ఇద్దరికి కరోనా పాజిటివ్‌గా నిర్ధారణ అయినట్లు ముఖ్యమంత్రి పినరయ్ విజయన్ ప్రకటించారు. 

మరో 7 మంది ఇతరుల నుంచి వైరస్ వ్యాప్తి చెందడం వల్ల కరోనా బారిన పడినట్లు తెలిపారు. తాజా కేసులతో కలిపి.. కేరళలో కరోనా పాజిటివ్ కేసుల సంఖ్య 963కు చేరింది. ప్రస్తుతం కరోనా యాక్టివ్ కేసుల సంఖ్య 415. 542 మంది కరోనా నుంచి కోలుకున్నారు.