ఐదుగురు కాంగ్రెస్ ఎమ్మెల్యేలు కనబడట్లేదు... ఎప్పుడైనా కూలిపోవచ్చు !

తమ ఎమ్మెల్యేలను లాక్కునేందుకు బిజెపి ప్రయత్నిస్తోందని ఆరోపిస్తూ ఇప్పటికే ఐదుగురు కాంగ్రెస్ ఎమ్యెల్యేలు కనబడటం లేదని జేడీఎస్‌ నేత, కర్ణాటక సీఎం కుమారస్వామి ఆరోపించారు. మరోకొద్దీ సేపట్లో అసెంబ్లీలో బడ్జెట్ ను ప్రవేశ పెట్టవలసి ఉండగా ఆయన ఈ ఆరోపణ చేయడం గమనార్హం. తమ ఎమ్మెల్యేలకు డబ్బు ఎరచూపి ప్రలోబాలకు గురిచేస్తున్నారని పేర్కొంటూ ఓ ఎమ్మెల్యేకు డబ్బు ఎరవేస్తున్న అంశంపై ఆడియో టేపును కర్ణాటక సీఎం విడుదల చేశారు.

ఇలా ఉండగా, ఏ క్షణంలోనైనా ప్రభుత్వానికి పతనం తప్పదని, ఎమ్మెల్యేలు ఎవరూ ప్రలోభాలకు లొంగరాదని బీజేపీ అధ్యక్షుడు యడ్యూరప్ప పార్టీ ఎమ్యెల్యేలకు హితవు పలికారు. పార్టీ ఎమ్మెల్యేలతో సుదీర్ఘ మంతనాలు జరుపుతూ ఎమ్మెల్యేలు ఆత్మస్థైర్యంతో ఉండాలని, ప్రలోభాలకు లొంగరాదని సూచించారు. కాంగ్రెస్‌ అంతర్గత కుమ్ములాటలు కలసి వస్తున్నాయని చెప్పారు. గవర్నర్‌ ప్రసంగం సమయంలోనే వారి బలం తేటతెల్లమైందని పేర్కొన్నారు. సీఎం కుమారస్వామిపై ఎవరికీ విశ్వాసం లేదని ఏ క్షణంలోనైనా ప్రభుత్వం కూలిపోవచ్చుని స్పష్టం చేసారు. 

కర్ణాటకలో గత ఏడాది కాంగ్రెస్‌-జేడీఎస్‌ కూటమి ప్రభుత్వాన్ని ఏర్పాటు చేసింది. శాసనసభ ఎన్నికల్లో ఏ పార్టీకీ పూర్తి మెజారిటీ రాకపోవడంతో తొలుత అతిపెద్ద పార్టీగా అవతరించిన బీజేపీ ప్రభుత్వ ఏర్పాటుకు ముందుకొచ్చింది. గవర్నర్‌ అవకాశమివ్వడంతో బిజెపి రాష్ట్ర అధ్యక్షుడు యడ్యూరప్ప ముఖ్యమంత్రిగా ప్రమాణస్వీకారం చేశారు.

అయితే శాసనసభలో ఆయన బలనిరూపణ చేసుకోలేకపోవడంతో కాంగ్రెస్‌, జేడీఎస్‌ కలిసి ప్రభుత్వాన్ని ఏర్పాటు చేశాయి. జేడీఎస్‌కు చెందిన కుమారస్వామి ముఖ్యమంత్రిగా బాధ్యతలు స్వీకరించారు. ఆపరేషన్‌ కమల పేరుతో కాంగ్రెస్‌, జేడీఎస్‌ ఎమ్మెల్యేలను బిజెపి ప్రలోభపెట్టేందుకు ప్రయత్నిస్తోందని చాలా రోజులుగా అధికార కూటమి ఆరోపిస్తూనే ఉన్నది. ఈ నేపథ్యంలో కుమారస్వామి ఈరోజు మీడియా సమావేశం నిర్వహించి ఆడియో టేపును విడుదల చేశారు.

మరోవైపు దాదాపు పది మంది కాంగ్రెస్ ఎమ్మెల్యేల గైర్హాజరుతో కాంగ్రెస్ - జేడీఎస్ సంకీర్ణ ప్రభుత్వానికి ఇబ్బందికర పరిస్థితులు ఏర్పడ్డాయి. ఎమ్మెల్యేలు ఎవరు ఎక్కడున్నారో తెలియక ఇరుపక్షాల నేతలు తలలు పట్టుకుంటున్నారు. ప్రభుత్వం మైనార్టీలో పడినదని అసెంబ్లీ బిజెపి సభ్యులు ఆందోళన చేస్తున్నారు.

బడ్జెట్‌ సందర్భంగా జేడీఎస్‌, కాంగ్రెస్ పార్టీలు తమ ఎమ్మెల్యేలకు విప్‌ జారీ చేశాయి. మావేశాలకు ఎమ్మెల్యేలు తప్పక హాజరు కావాలని విప్‌ జారీ చేశారు. ఏ ఒక్కరు రాకున్నా చర్యలు తప్పవని హెచ్చరించారు.

ఈ వార్తల నేపథ్యంలో రాయచూరు కాంగ్రెస్ ఎమ్మెల్యే బసన్నగౌడ దడ్డల్... మీడియాతో మాట్లాడారు. బడ్జెట్ సమావేశాలకు హాజరవుతున్నట్టు ప్రకటించారు. బసన్నకు మహర్షి వాల్మీకి షెడ్యూల్డ్ ట్రైబ్స్ డెవలప్‌మెంట్ బోర్డు చైర్మన్‌గా నియమిస్తూ సీఎం కుమారస్వామి ఉత్తర్వులు జారీ చేసిన తర్వాత ఆయన ఈ ప్రకటన చేయడం గమనార్హం. మరోవంక అసంతృప్తితో ఉన్న కాంగ్రెస్ ఎమ్మెల్యే డాక్టర్ ఉమేశ్ జాదవ్‌ ను వేర్ హౌస్ కార్పొరేషన్ చైర్మన్‌ పదవి నుండి తొలగించారు. ఆయన స్థానంలో ప్రతాప్ గౌడ పాటిల్‌ను నియమించారు.