ఇక ఎన్నికల్లో పోటీకి సుష్మ స్వరాజ్ దూరం

 విదేశాంగ మంత్రి, బీజేపీ సీనియర్ సుష్మ స్వరాజ్ ఇకపై ఎన్నికల్లో పోటీచేయబోనని నిర్ణయించుకున్నట్లు ప్రకటించారు. దానితో  2019 ఎన్నికల బరిలో ఉంబోనని స్పష్టం చేసారు. ఈ విషయం ఇప్పటికే పార్టీకి తెలిపానని, పార్టీ ఒక నిర్ణయం తీసుకొంటుందని అంటూ వచ్చే ఎన్నికల్లో పోటీ చేయకుండా ఉండేందుకు మనసును సిద్ధం చేసుకున్నానని చెప్పారు. ఆరోగ్యపరమైన కారణాలతోనే ఎన్నికల్లో పోటీ చేయకూడదని నిర్ణయం తీసుకున్నట్లు ఆమె వెల్లడించారు.

సుష్మాస్వరాజ్‌ 2016లో మధుమేహం కారణంగా కొన్ని నెలల పాటు అధికారిక విధుల నుంచి దూరంగా ఉండాల్సి వచ్చింది. ఈ మధ్యనే ఆమెకు కిడ్నీ మార్పిడి కూడా జరిగింది. అందుకే ఎన్నికలకు దూరంగా ఉంటున్నట్లు ప్రకటించారు. అయితే సుష్మ ఎన్నికలకు దూరంగా ఉంటే రాజ్యసభ ద్వారా అయినా ఆమెను పార్లమెంటుకు తీసుకురావాలనే ఆలోచనలో బీజేపీ ఉన్నట్లు తెలుస్తోంది.

 బీజేపీలో సీనియర్ నేతగా ఉన్న సుష్మా స్వరాజ్‌ ప్రస్తుతం మధ్యప్రదేశ్‌లోని విదిశ నుంచి ఎంపీగా ప్రాతినిధ్యం వహిస్తున్నారు. ఏడు సార్లు ఎంపీగా గెలిచిన ట్రాక్ రికార్డ్ ఉంది. గతంలో ఢిల్లీ ముఖ్యమంత్రిగా కొద్దికాలం పనిచేశారు. అలాగే వాజపాయి మంత్రివర్గంలో కేంద్ర ఆరోగ్య సంక్షేమ శాఖ, టెలికమ్యూనికేషన్స్‌, సమాచార ప్రసార మంత్రిత్వ శాఖల మంత్రిగా బాధ్యతలు నిర్వర్తించారు. అంతేకాదు మంచి వక్తగా సుష్మకు పేరు ఉంది. బిజెపి ప్రధాన కార్యదర్శిగా, అధికార ప్రతినిధిగా కుడా పనిచేసారు.

జనతా పార్టీ హయంలో హర్యానా మంత్రివర్గంలో అతి పిన్న వయస్సులో 25 ఏళ్ళకే చేరారు. నరేంద్ర మోదీ నేతృత్వంలోని ఎన్డీయే ప్రభుత్వంలో ప్రస్తుతం విదేశాంగ మంత్రిగా పని చేస్తున్నారు.